शाश्वत विकासाची कल्पना प्रत्यक्षात आणणे हे पुणे महानगर प्रदेश विकास प्राधिकरणाचे स्वप्न आहे. पुणे महानगर प्रदेशामध्ये पारंपारिक विचारांऐवजी नाविन्यपूर्ण पद्धतीने नगरविकासाचा आराखडा करणेसाठी आणि दिशा देण्यासाठी पुणे महानगर प्रदेश विकास प्राधिकरणाची स्थापना करण्यात आली आहे. सुसूत्र प्रगती आणि डीजीटल माहिती उपलब्धतेच्या भक्कम पायावर पुणे महानगर प्रदेश विकास प्राधिकरणातील प्रत्येक समाविष्ट घटकाला अधिवास आणि व्यवसाय सुलभता, यासोबत सर्वोत्तम जीवनशैली उपभोगता यावी याकरिता प्राधिकरण कटिबद्ध आहे. एकविसाव्या शतकातील शहरीकरणाचे जागतिक आणि आदर्शवत उदाहरण साकार करण्याचा आमचा मानस आहे.

महाराष्ट्र राज्याचे मुख्यमंत्री मा. श्री. देवेंद्र फडणवीस यांच्या दूरदृष्टीतून साकार झालेले, भारताबरोबरच जागतिक अर्थकारणामध्ये आंतरदेशीय आणि आंतरराष्ट्रीय गुंतवणुकदारांसाठी सर्वात जास्त किफायतशीर आणि आर्थिक विकासास चालना देणारे आदर्श क्षेत्र म्हणून पुणे महानगर प्रदेश विकसित होत आहे. प्रचलित शासनव्यवस्था, वर्धीतवेगाची सुयोग्य दिशा आणि नागरीकरणाचे काटेकोर आरेखन या सर्व पारंपारिक बाबींमधील आमुलाग्र सकारात्मक बदलाचे दयोतक म्हणजेच पुणे महानगर प्रदेश विकास प्राधिकरण होय!

पुणे महानगर प्रदेश हे देशातील एक प्रमुख आर्थिक आणि सांस्कृतिक केंद्र व्हावे, या उद्दिष्टासाठी काम करणारे अनुभवी नियोजक आणि अंमलबजावणीमध्ये निष्णात तज्ज्ञ गटाच्या हाती याची जबाबदारी सोपविण्यात आलेली आहे. पारदर्शक व समग्र आराखड्याच्या प्रक्रियेसह पद्धतशीर अंमलबजावणी यांवर आधारित, या क्षेत्राचे उज्ज्वल भविष्य हेही आमचे ध्येय आहे. कार्यक्षमता, एकात्मिकता आणि प्रभावी परिणामकारकता हा पुणे महानगर प्रदेश विकास प्राधिकरणाच्या कार्यशक्तीचा गाभा आहे.

पुणे महानगर प्रदेशामध्ये डिजिटल पद्धतीची नियामक प्रणाली राबवून व्यवसाय सुलभतेमध्ये वाढ करण्याचेही आमचे ध्येय आहे. यामुळे ‘एक खिडकी योजना’ निव्वळ संकल्पना न रहाता त्यामध्ये कमालीची विश्वासार्हता अंगीकारण्यात आली आहे व त्याद्वारे गुंतवणूकदारही प्रोत्साहित होतील. एकविसाव्या शतकामध्ये शाश्वत विकास साधण्यासाठी शासनव्यवस्थेची पातळी डिजिटल युगानुरूप उंचावणे, तसेच सक्षम होतकरू गुंतवणूकदारांना अधिक व्यवसाय सुलभता मिळावी अशा रीतीनेच पुणे महानगर प्रदेश विकास प्राधिकरणामधील सर्व प्रणालींची आखणी करण्यात आली आहे.

माहिती तंत्रज्ञानाच्या युगास अनुकूल अशी नगरविकास आणि शासनव्यवस्थेमध्ये सुधारणा करणेसाठी पुणे महानगर प्रदेश विकास प्राधिकरणामार्फत सर्व कायदेशीर आणि नियामक प्रक्रिया इलेक्ट्रोनिक आणि डिजिटल माध्यमांद्वारा एकत्रित करण्याची प्रक्रिया राबविण्यात येत आहे. नागरिकांचे आरोग्य तथा जीवनशैली निर्देशांक जगामध्ये सर्वोच्च असावा, यासाठी सर्व सहभागधारकांना माहिती उपलब्ध होऊन त्याची हाताळणी सहज व्हावी, यासाठी प्राधिकरण कार्यशील राहणार आहे. भविष्याचा वेध घेऊन आदर्श व कार्यक्षम ऊर्जा वापराची पर्यावरणपूरक यंत्रणा विकसित करणार आहोत.